Экалагічны фестываль лесу “Гамоняць пушчы беларускія” па традыцыі адбудзецца ў горадзе Свіслач.
Гэтым разам фестываль збярэ ўдзельнікаў з Гродзенскай і Брэсцкай абласцей, а таксама з Польшчы і Латвіі. Завітаюць і зоркі беларускай эстрады Гюнеш, Алена Ланская, поп-фольк-гурт “Лялькі Карпарэйшн” і шоў-балет “Феерыя”.
Відовішчнымі і цікавымі абяцаюць быць усе пляцоўкі: паляўнічая, экалагічная, леснічоўка, горад майстроў, пляцоўка-вернісаж і Пушчанскія падворкі. А таму варта наведаць усе. Тут можна даведацца пра сакрэты лекавых раслін у траўніцы, пакатацца на кані, навучыцца плясці з саломкі ды лазы, сесць за ганчарны круг і зрабіць сваю першую талерачку ці кубачак, сплясці сабе ўнікальны пояс ці нават навучыцца маляваць. Даведацца пра асаблівасці палявання ў мінулыя стагоддзі, пабачыць самыя незвычайныя трафеі і пазнаць кулінарныя сакрэты прыгатавання паляўнічых страў.
Відовішчным абяцае стаць конкурс прафесійных лесарубаў.
Пачатак свята 18 жніўня а 12-ай гадзіне на цэнтральная плошчы, а асноўныя падзеі разгарнуцца ў гарадскім парку. Уваход вольны.